អូស្ត្រាលី៖ នាយករដ្ឋមន្ត្រីអូស្ត្រាលី លោក ស្កុត មូរីសាន់ បានផ្ញើលិខិតអបអរសាទរនិងចូលរួមរីករាយនៅក្នុងពិធីបុណ្យចូលឆ្នាំប្រពៃណីជាតិខ្មែរដែលកំពុងតែប្រព្រឹត្តនៅខែមេសានេះ។ លោកបានអរគុណដល់កម្ពុជាដែលបានធ្វើឲ្យអូស្ត្រាលីមានអារម្មណ៍ថាសុវត្ថិភាព និងធានាបាននូវសុខមាលភាពពីជំងឺកូវីដ-១៩។
ក្នុងសារលិខិតអបអរពិធីបុណ្យចូលឆ្នាំប្រពៃណីជាតិខ្មែរ លោក Scott Morrison បានចាត់ទុកការរៀបចំពិធីបុណ្យចូលឆ្នាំថ្មី ជានិមិត្តសញ្ញានៃសុច្ឆន្ទៈ ការដឹងគុណ ការសម្អាត និងការលើកទឹកចិត្ត នៅពេលដែលយើងលាគ្នាមួយឆ្នាំដ៏លំបាកមួយទៀត។
លោកបានលើកឡើងថា ការរៀបចំពិធីចូលឆ្នាំក្រោយពីវិបត្តិកូវីដ-១៩ បានបង្ហាញនូវជោគជ័យមួយរបស់កម្ពុជា និងជាឆ្នាំនៃការបង្កើតទំនាក់ទំនងឡើងវិញជាមួយកម្ពុជាក្រោយពីវិបត្តិនៃជំងឺរាតត្បាត។
លោកថា៖ «ខ្ញុំចង់អរគុណអ្នកដែលបានជួយថែរក្សាយើងទាំងអស់គ្នាដោយសុវត្ថិភាព និងធានាបាននូវសុខុមាលភាពអ្នកនៅជុំវិញអ្នក។ [...] ថ្ងៃនេះនៅឆ្នាំថ្មី យើងទន្ទឹងរង់ចាំពេលវេលាល្អប្រសើរ និងជាឆ្នាំនៃការទំនាក់ទំនងឡើងវិញ។ សូមទេវតាឆ្នាំថ្មី ប្រោសប្រទានពរជ័យ សិរីមង្គល វិបុលសុខ ជូនដល់លោកអ្នក និងក្រុមគ្រួសារ»៕
